თეთრიწყაროს მუნიციპალიტეტის მერიის ორგანიზებით, ტურისტული კომპანიების წარმომადგენლებისათვის და დამოუკიდებელი  გიდებისათვის საინფორმაციო ტური გაიმართა

ქვემო ქართლში, 5 აპრილს, სახელმწიფო რწმუნებულის ადმინისტრაციის და თეთრიწყაროს მუნიციპალიტეტის მერიის ორგანიზებით, ტურისტული კომპანიების წარმომადგენლებისათვის და დამოუკიდებელი გიდებისათვის, საინფორმაციო ტური გაიმართა.

თეთრიწყაროს მუნიციპალიტეტის ინფორმაციით, მოწვეულმა სტუმრებმა მოინახულეს უძველესი ისტორიული ციხე-ქალაქი სამშვილდე, ასევე მოინახულეს ალგეთის წყალსაცავის და ბირთვისის კანიონის მისადგომები, სოფელ ასურეთში (ელიზაბეტტალი) არსებული გერმანული მემკვიდრეობა, გერმანული საოჯახო მარნები და გაეცნენ ადგილობრივი ღვინის - „შალას“ (ასურეთული შავი) წარმოების პროცესს და შენახვის ტექნოლოგიებს. სტუმრებს, სამშვილდის არქეოლოგიური ექსპედიციის მიერ ჩატარებული კვლევის შედეგები ექსპედიციის ხელმძღვანელმა, არქეოლოგმა, პროფესორმა დავით ბერიკაშვილმა გააცნო.

მისივე ცნობით, მომსახურების სერვისის გაცნობის მიზნით, ტურიზმის სფეროს წარმომადგენლები თეთრიწყაროში მდებარე საოჯახო სასტუმროს - „მხატვრის სახლს“ და კვების ობიექტებს ესტუმრნენ.

„საინფორმაციო ტურის მიზანს წარმოადგენდა ტურიზმის სფეროს წარმომადგენლებისათვის თეთრიწყაროს ტურისტული პოტენციალის გაცნობა და წარმოჩენა.

საინფორმაციო ტურში მონაწილეობა მიიღეს თეთრიწყაროს მუნიციპალიტეტის მერმა გიორგი ქორიძემ, ქვემო ქართლში სახელმწიფო რწმუნებულის მოადგილემ კახა კობერიძემ, ადგილობრივი თვითმმართველობის სამსახურის უფროსმა ლევან ჟვანიამ და მერიის სოფლის მეურნეობის და ეკონომიკის განვითარების ხელშეწყობის სამსახურის უფროსმა ვალერიან სუხიტაშვილმა. სტუმრებს მეგზურობა გაუწიეს მერიის ეკონომიკის, მცირე ბიზნესისა და ტურიზმის განვითარების ხელშეწყობის განყოფილების სპეციალისტმა ლამარა ბექაურმა და მხატვარმა ია არსენიშვილმა“, -აღნიშნულია თეთრიწყაროს მუნიციპალიტეტის მიერ გავრცელებულ განცხადებაში.

როგორც ცნობილია, თეთრიწყაროს მუნიციპალიტეტი ისტორიულ-კულტურული მემკვიდრეობის და ბუნების უნიკალური ძეგლების სიმრავლით, ჩვენი ქვეყნის ერთ-ერთი გამორჩეული და შთამბეჭდავი მხარეა. ტურიზმის განვითარების და არსებული პოტენციალის წარმოჩენის მიზნით, თეთრიწყაროს მუნიციპალიტეტის მერია, ქვემო ქართლში სახელმწიფო რწმუნებულის ადმინისტრაციასთან ერთად აქტიურად მუშაობს.

ამირან სალუქვაძე - მიუღებელი რეალობაა - ხელისუფლებას და ოპოზიციას ერთმანეთი აწყობთ
ქართული პრესის მიმოხილვა 25.05.2020
ნათია თურნავა - ყველა წინაპირობაა, რომ 2021 წელი წარმატებული წელი იყოს
თემურ ჩუბინიძე - ჩვენი მეშახტეები გმირები არიან
უძრავი ქონების პლატფორმა Livo სამშენებლო კომპანიებს უფასო კონსულტაციას გაუწევს
"ავერსი" მომხმარებელს ახალ პროექტს - "სააფთიაქო თაროს" სთავაზობს
„ევრონიუს საქართველო“ საცდელ მაუწყებლობას იწყებს