11 აპრილს, ტაქსის მძღოლები თბილისში აქცია-მსვლელობას გამართავენ. როგორც მათ დღეს გამართულ პრესკონფერენციაზე განაცხადეს, თბილისის მერიაში აქცია-მსვლელობის შესახებ განაცხადი უკვე შენატანილია.
როგორც ტაქსის მძღოლებმა განაცხადეს, 11 აპრილს ისინი აგრარული უნივერსიტეტის წინ მდებარე ეკლესიასთან შეიკრიბებიან, რუსთაველის გამზირს გაივლიან და მსვლელობას ბიძინა ივანიშვილის სასახლესთან დაასრულებენ.
„ტაქსების მონოპოლიის შექმნას არ დავუშვებთ. ჩვენ კვლავ ვაგრძელებთ ბრძოლას საიმისოდ, რომ გაუქმდეს ტაქსის მძღოლების დევნისაკენ მიმართული იძულებითი რეფორმები. მათ შორის, პირველ რიგში, ვითხოვთ, იძულებითი გადაღებვის საკითხი მოიხსნას დღის წესრიგიდან. მანამდე, ჩვენი საპროტესტო გამოსვლის გეგმები ძალაშია. 11 აპრილს, ამ ადგილიდან, აგრარული უნივერსიტეტიდან, 14:00 საათზე, დაიძვრება ტაქსების დიდი კოლონა, რუსთაველის გავლით, ივანიშვილის სასახლისაკენ. ან ხელისუფლება გონს მოეგება, ან კალაძე-ივანიშვილი გაიქცევიან. მოთხოვნა არის პრინციპული. ეს ადამიანები შრომობენ საკუთარი ოჯახების გადასარჩენად. ამიტომ, ჩვენ კვლავ და კვლავ მოვითხოვთ, რომ იძულებითი რეფორმა გაუქმდეს“, - განაცხადა აქციის ორგანიზატორმა, ლაშა ჩხარტიშვილმა.