ბორჯომის მერი მერი ლევან ლიპარტია, წარმომადგენელთან ლაშა კევლიშვილთან და საკრებულოს წევრებთან ირაკლი კვირკველიასთან და ელზა კუჭუხიძესთან ერთად სოფელ ჭობისხევს და სოფელ ლარებს ესტუმრა, - ამის შესახებ „ინტერპრესნიუსს“ ბორჯომის მუნიციპალიტეტიდან აცნობეს.

მათივე ცნობით, საჭიროებების გამოვლენასთან ერთად, ადგილობრივი თვითმმართველობის წარმომადგენლებმა მოსახლეობას მიმდინარე და დაგეგმილი პროექტების შესახებ მიაწოდეს ინფორმაცია.

სოფელ ჭობისხევში წელს ადგილობრივი დაფინანსებით, სტადიონის, სასმელი წყლის სათავე ნაგებობის, ასევე სკოლის მიმდებარედ საყრდენი კედლის რეაბილიტაცია განხორციელდება. მოეწყობა ასევე გარე-განათება, დაიწყება სოფელში გზის დარჩენილი მონაკვეთების საპროექტო სამუშაოები. სოფლის პროგრამით კი სოფელში ტრენაჟორებისა და ატრაქციონების განთავსება მოხდება.

სოფელ ლარებში წელს გარე-განათების მოწყობა და სასმელი წყლის სათავე ნაგებობის რეაბილიტაცია განხორციელდება.

შეხვედრები რამდენიმე კვირის წინ დაიწყო და ის მუნიციპალიტეტის ყველა სოფელს მოიცავს.