გურიაში 9 აპრილს დაღუპულებს პატივი მიაგეს. გურიაში მხარისა და ადგილობრივი ხელისუფლების წარმომადგენლებმა, ოზურგეთისა და ჩოხატაურის მუნიციპალიტეტების საკრებულოს წევრებმა, 9 აპრილს დაღუპული ნინო თოიძისა და ნატო გიორგაძის საფლავები გვირგვინებით შეამკეს. ასევე იმყოფებოდნენ სამშობლოს დამოუკიდებლობისთვის დაღუპულთა ობელისკთან, ეროვნული გმირის, ზაზა დამენიას საფლავზე და ყვავილები მიიტანეს. მოგვიანებით კი ჩოხატაურში 9 აპრილის მემორიალთან შეიკრიბნენ და კიდევ ერთხელ გაიხსენეს 30 წლის წინ განვითარებული მოვლენები.
„ტკივილით სავსე 30 წელი - 1989 წლის 9 აპრილმა, ჩვენს ქვეყანას დამოუკიდებლობა მოუტანა და ჩვენ თავისუფლება გვაჩუქა. ტრაგედიიდან ორ წელიწადში, ჩვენი გმირების თავგანწირვის შედეგად, ნანატრი თავისუფლება მოვიპოვეთ. იმ 21 გმირს შორის, რომლებმაც ქვეყნისთვის თავი გასწირეს, ოზურგეთელი ნინო თოიძე და ჩოხატაურელი ნატო გიორგაძე იყვნენ. დღეს, ჩვენ მათ ხსოვნას პატივი მივაგეთ, კიდევ ერთხელ გავიხსენეთ და ქედი მოვიხარეთ მათი ოჯახების წინაშე. დროა მადლიერების, მადლობა თავისუფლებისთვის, დიდება გმირებს!"- განაცხადა სახელმწიფო რწმუნებულმა გურიაში ზურაბ ნასარაიამ.