ბათუმში ახალი მეჩეთის მშენებლობის საქმეზე სასამართლო სხდომა ბათუმის საქალაქო სასამართლოში ხვალ, 10:00 საათზე გაიმართება.

მოსარჩელე მხარის განცხადებით, სასამართლო დავის ფარგლებში მუსლიმი თემის ინტერესებს ადამიანის უფლებების სწავლებისა და მონიტორინგის ცენტრი (EMC) და ტოლერანტობისა და მრავალფეროვნების ინსტიტუტი (TDI) წარმოადგენენ.

მოსარჩელე მხარის მტკიცებით, სარჩელის მიზანს ბათუმში ახალი მეჩეთის მშენებლობაზე, ბათუმის მერიის მიერ ნებართვის გაცემაზე უარის თქმის კანონიერების შესწავლა და რელიგიის ნიშნით დისკრიმინაციული მოპყრობის დადგენა წარმოადგენს.

ბათუმის საქალაქო სასამართლოში მეჩეთის მშენებლობასთან დაკავშირებით პროცესს აჭარის მთავრობის თავმჯდომარე გამოეხმაურა. თორნიკე რიჟვაძემ ჟურნალისტებთან აღნიშნა, რომ იგი სასამართლო პროცესს ელოდება და წინასწარ განმარტებისგან თავს იკავებს.