ზესტაფონის მუნიციპალიტეტში 9 აპრილი, როგორც სამშობლოსათვის დაღუპულ გმირთა ხსოვნისა და საქართველოს სახელმწიფოებრივი დამოუკიდებლობის აღდგენის დღე, აღინიშნა. ამის შესახებ „ინტერპრესნიუსს“ ზესტაფონის მუნიციპალიტეტიდან აცნობეს.

დილიდანვე, ქალაქის ცენტრში, 9 აპრილის სახელობის სკვერში გმირთა მემორიალი გვირგვინებით შეამკეს ადგილობრივი ხელისუფლების წარმომადგენლებმა, ხელოვნებისა და კულტურის მუშაკებმა, სკოლის მოსწავლეებმა და მოქალაქეებმა.

„9 აპრილის უშუალო მონაწილეებმა ოცდაათი წლის წინ საქართველოში დატრიალებული ტრაგიკული მოვლენები და 9 აპრილის გმირები გაიხსენეს. მარგვეთისა და უბისის ეპისკოპოსმა, სასულიერო პირებმა, მრევლთან და საზოგადოების წევრებთან ერთად საკათედრო ტაძრიდან 9 აპრილის მემორიალამდე მსვლელობა მოაწყეს და დაღუპულთა სულის მოსახსენიებელი პანაშვიდი გადაიხადეს.

9 აპრილის აღსანიშნავად ზესტაფონში იმერეთის სახელმწიფო რწმუნებულის პირველი მოადგილე, ზვიად შალამბერიძე იმყოფებოდა.

ხსოვნის დღისადმი მიძღვნილი ღონისძიება ზესტაფონის მხარეთმცოდნეობის მუზეუმში გაგრძელდა“, - ნათქვამია ინფორმაციაში.