გიგი უგულავა მთელი დღე ახდენდა მარნეულში ორგანიზებას, რომ კონფლიქტი არ მომხდარიყო, - ამის შესახებ "ევროპული საქართველოს" ერთ-ერთმა ლიდერმა გოკა გაბაშვილმა სასამართლო პროცესზე განაცხადა.

როგორც ის განმარტავს, 2014 წელს, მარნეულში პოლიტიკურ პროტესტს გამოხატავდნენ და თან ფრთხილობდნენ, რომ ვინმეს რაიმე სახის პროვოკაცია არ მოეხდინა.

ცნობისთვის, 2014 წელს, "ნაციონალური მოძრაობიდან" მარნეულში კენჭს ახმედ იმამკულიევი იყრიდა. მისი კანდიდატურის საარჩევნო სიიდან მოხსნის გასაპროტესტებლად მარნეულში ოპოზიციის ლიდერები ჩავიდნენ, რასაც საპროტესტო აქცია მოჰყვა. სწორედ აღნიშნულ აქციაზე ედავებიან გიგი უგულავას იძულებას და ჯგუფური მოქმედების ორგანიზებას.