ზაურ დარგალი არის საამაყო მაგალითი იმისა, თუ როგორ უნდა შეძლოს ახალგაზრდა, ეთნიკურად აზერბაიჯანელმა ადამიანმა, თავისი შრომითა და განათლებით, ძალიან დიდ წარმატებას მიაღწიოს, - ამის შესახებ „ქართული ოცნების“ პოლიტიკურმა მდივანმა ირაკლი ღარიბაშვილმა მარნეულში მერობის კანდიდატად ზაურ დარგალის წარდგენისას განაცხადა.
მისი თქმით, ზაურ დარგალი მარნეულის საამაყო მერი იქნება და ის ხალხის კეთილდღებაზე იზრუნებს.
„ზაური, დაახლოებით, 6 წლის წინ გავიცანი. მას შემდეგ ჩვენ ყველანი მის ძალიან დიდ პროგრესსა და წარმატებას ვხედავთ. მისი წარმატება მის შრომისმოყვარეობაში მდგომარეობს. მჯერა, რომ ზაურ დარგალი იქნება თქვენი საამაყო ქალაქის მერი. ის მოემსახურება მარნეულელ ხალხს, იზრუნებს თქვენს კეთილდღეობაზე და მუდამ თქვენ გვერდით იქნება“, - განაცხადა ირაკლი ღარიბაშვილმა.
შეგახსენებთ, რომ 2019 წლის 19 მაისს ქვეყნის რამდენიმე რეგიონში მერების რიგგარეშე და საკრებულოების შუალედური არჩევნები გაიმართება.