აჭარის ტურიზმის დეპარტამენტის მოწვევით, რეგიონს უკრაინული ტურისტული სააგენტოების წარმომადგენლები სტუმრობენ. ამის შესახებ „ინტერპრესნიუსს“ აჭარის ავტონომიური რესპუბლიკის მთავრობის პრესსამსახურიდან აცნობეს.
მათი ინფორმაციით, სტუმრები ბათუმის ტურისტული ღირსშესანიშნაობებისა და ტურისტული ინფრასტრუქტურის დათვალიერების შემდეგ, ადგილობრივი ტურისტული სააგენტოების წარმომადგენლებს ხვდებიან და ურთიერთანამშრომლობის საკითხებს განიხილავენ. შეხვედრის შემდეგ, უკრაინელი სტუმრები ბათუმის ბოტანიკურ ბაღსა და ქედის მუნიციპალიტეტს ესტუმრებიან. საოჯახო მარნებში მათთვის ფოლკლორული შოუ და ადგილობრივი სამზარეულოს დეგუსტაცია გაიმართება. ინფოტურის მონაწილეები აჭარას 15 აპრილს დატოვებენ.
„უკრაინიდან აჭარის რეგიონში მოგზაურების რაოდენობა ყოველწლიურად იზრდება. გასულ წელს უკრაინიდან აჭარაში 44%-ით მეტი მოგზაურის ვიზიტი განხორციელდა. აჭარის ტურიზმის დეპარტამენტის მოწვევით, წამყვანი ტურისტულის სააგენტოებისა და მედიის წარმომადგენლები რეგიონს ხშირად სტუმრობენ. 2018-2019 წლებში, ჯამში რეგიონმა სამიზნე ქვეყნებიდან 1000-ზე მეტ ჟურნალისტსა და ტურისტულ სააგენტოს უმასპინძლა,” - ნათქვამია აჭარის მთავრობის ინფორმაციაში.