გოგი წულაია ზესტაფონის მერობისთვის იბრძოლებს

ზესტაფონის მერობისთვის პარტია „თავისუფალი საქართველოს" თანათავმჯდომარე გოგი წულაია იბრძოლებს. გოგი წულაია ამომრჩევლებს პარტიის ლიდერმა კახა კუკავამ წარუდგინა.

წარდგენას პარტიის წევრები და პარლამენტის დამოუკიდებელი დეპუტატი დავით ჭიჭინაძე ესწრებოდნენ. მათი თქმით, მთავარი მიზანია, ხელისუფლებაში „ნაციონალური მოძრაობა" არ დაბრუნდეს და დასრულდეს „ქართული ოცნების" მმართველობა.

მერობის კანდიდატმა ამომრჩევლებთან თვითმმართველობების უფლებების გაზრდის აუცილებლობაზე ისაუბრა.

„ზესტაფონიდან დავიწყებ ბრძოლას რეალური თვითმმართველობისთვის. მარაზმია და უზნეობაა, როდესაც ფერო წამლავს ადამიანებს ზესტაფონში და იქ გამომუშავებული თანხა მიდის თბილისში. ზესტაფონლებს არ დავპირდები რომ ავაშენებ. მე არავის არ ავაშენებ, ყველამ ერთად უნდა ავაშენოთ", - განაცხადა გოგი წულაიამ.