ზუგდიდის მუნიციპალიტეტის სოფელ გრიგოლიშში ახალგაზრდა მამაკაცის დაჭრის შესახებ ახალი დეტალები ხდება ცნობილი

ზუგდიდის მუნიციპალიტეტის სოფელ გრიგოლიშში ახალგაზრდა მამაკაცის დაჭრის შესახებ ახალი დეტალები ხდება ცნობილი.

ადგილობრივების ინფორმაციით, 28 წლის ალიკა ლაგვილავასა და ბეჟან გვაზავას შორის შელაპარაკება ზუგდიდის სოფელ გრიგოლიშის "ქართული ოცნების" საარჩევნო შტაბში მოხდა. მათივე ინფორმაციით, ორივე "ქართული ოცნების" მხარდამჭერია. ალეკო ლაგვილავა მძიმედ არის დაჭრილი.

მმართველი პარტიის საარჩევნო შტაბში აცხადებენ, რომ, ლაგვილავა მათი კოორდინატორია, თუმცა არ ადასტურებენ ინფორმაციას, რომ გვაზავა მათი აქტივისტია.

"როგორც ცნობილია, მომხდარი დაპირისპირების შედეგად დაჭრილია ერთი ადამიანი, რომელსაც ამ დროისთვის უტარდება გადაუდებელი სამედიცინო დახმარება. არ ვფლობთ ინფორმაციას მომხდარ დაპირისპირებაში მონაწილე პირების შესახებ. საქართველოს შინაგან საქმეთა სამინისტრომ მოახდინა სწრაფი რეაგირება და დაწყებულია გამოძიება. ძალოვანი უწყება იღებს ყველა საჭირო ზომას, რათა სწრაფად დადგინდეს მომხდარის დეტალები, გამოვლინდეს და კანონის შესაბამისად პასუხისგებაში მიეცეს ყველა დამნაშავე. ჩვენც საზოგადოებასთან ერთად ველით გამოძიების შედეგებს", - აღნიშნა შტაბის წევრმა მამუკა წოწერიამ.