სუს-ის რესურსები მიმართულია პოლიტიკური ოპოზიციის შევიწროვებისთვის ნაცვლად იმისა, რომ ეს რესურსები მიემართებოდეს იქ, სადაც ჩვენს ქვეყანას ესაჭიროება, - ამის შესახებ „ერთიანი ნაციონალური მოძრაობის" წევრმა სალომე სამადაშვილმა პარლამენტში სუს-ის 2018 ანგარიშის წარდგენამდე განაცხადა.
სამადაშვილის თქმით, ამ ყველაფერის შედეგებს ყველა ხედავს.
„მე ვფიქრობ, რომ დღეს ჩვენი ქვეყნის ერთ-ერთი მთავარი პრობლემა არის ის, რომ სუს-ის რესურსები, სამწუხაროდ, მიმართულია ოპოზიციის შევიწროვებისთვის ნაცვლად იმისა, რომ ეს რესურსები მიემართებოდეს იქ, სადაც ჩვენს ქვეყანას ესაჭიროება და ამის შედეგებს ვხედავთ. შედეგი კი არის ის, რომ მკვეთრად არის გაუარესებული ჩვენი უსაფრთხოების ვითარება ე.წ. საზღვრის მიმდებარე ტერიტორიებზე. ვხედავთ, რომ გრძელდება ჩვენი მოქალაქეების გატაცება და მკვლელობა. ვხედავთ რაც მოხდა პანკისში, რაც არის სერიოზული გამოწვევა. საინტერესოა, რა პასუხი აქვს სუს-ს დღემდე გამოუძიებელ მაჩალიკაშვილის მკვლელობაზეც“, - განაცხადა სალომე სამადაშვილმა.