აჭარის ავტონომიური რესპუბლიკის უმაღლესი საბჭოს თავმჯდომარე დავით გაბაიძე, ბათუმში, ამერიკულ კუთხეში საქართველო-აშშ-ის ურთიერთობისადმი მიძღვნილი გამოფენის გახსნის ღონისძიებას დაესწრო, - ამის შესახებ „ინტერპრესნიუსს“ აჭარის უმაღლესი საბჭოდან აცნობეს.

გამოფენა, რომელსაც საქართველოში ამერიკის შეერთებული შტატების ელჩის მოვალეობის შემსრულებელი როს უილსონი და ამერიკის საელჩოს პრეს-ატაშე კრისტოფერ დავენფორთი დაესწრნენ, ორ ქვეყანას შორის ურთიერთობების საწყის წლებს ასახავს.

მე-19 საუკუნის 90-იან წლებში ბათუმში შეერთებული შტატების პირველი საკონსულოს გახსნამ სათავე დაუდო შემდგომ დიპლომატიურ ურთიერთობებს. პოსტერებზე წარმოდგენილია 1897-1970 წლების მანძილზე გადაღებული ფოტომასალა, რომელიც ასახავს ამერიკელი კონსულების, კულტურის სფეროს წარმომადგენლებისა და მოგზაურების ვიზიტებს ბათუმში.