პარტია „ქართული ოცნებიდან“ მარნეულის #22 საოლქო საარჩევნო კომისიის წევრი გიორგი თაბუკაშვილი „ერთიანი ნაციონალური მოძრაობიდან“ საოლქოს წევრ ლაშა ქველაძეს ძალადობაში ადანაშაულებს.
როგორც გიორგი თაბუკაშვილი აცხადებს, საოლქო საარჩევნო კომისიიდან გამოსულს, ლაშა ქველაძე თავს დაესხა და ფიზიკურად გაუსწორდა.
,,გუშინ დილით, დაახლოებით 11 საათზე საოლქო საარჩევნო კომისიის შენობიდან გამოვედი, გზაში დამეწია ლაშა ქველაძე. ის ჩემგან მოითხოვდა, რომ მარნეულში არ ჩავსულიყავი, უარის შემდეგ კი თავს დამესხა და ფიზიკურად გამისწორდა. დაზიანებები მაქვს სახის, თავისა და ხელის არეში. ფაქტზე რეაგირების მიზნით მივმართე სამართალდამცავებს, ჩამიტარდა შესაბამისი ექსპერტიზაც“, - განაცხადა ,,ინტერპრესნიუსთან“ საუბარში გიორგი თაბუკაშვილმა.
თაბუკაშვილის ბრალდებას კატეგორიულად უარყოფს ლაშა ქველაძე და აცხადებს, რომ მისი მხრიდან დაპირისპირებას ადგილი არ ჰქონია.
როგორც ,,ინტერპრესნიუსს“ შსს-ში განუცხადეს, სისხლის სამართლის საქმე 126 მუხლით აღიძრა, რაც ძალადობას გულისხმობს. მიმდინარეობს ორივე მხარის გამოკითხვა.