ლიბიიდან დაბრუნებული ქართველი მეზღვაურები ახლობლების პროტესტს ემიჯნებიან და აცხადებენ, რომ ლიბიაში ყოფნისას საქართველოს საგარეო საქმეთა სამინისტროდან მათ სისტემატიურად უკავშირდებოდნენ და დახმარებას უწევდნენ.

მათი თქმით, გუშინ სარფის საბაჟოზე საქართველოში დაბრუნებისას პროცედურა გაჭიანურდა, რაც მეზღვაურების ახლობლებმა გააპროტესტეს და საგარეო საქმეთა სამინისტრო უყურადღებობაში დაადანაშაულეს.

„საბაჟო პროცედურები გაჭიანურდა, რადგან დამატებითი კითხვები იყო, ამ დროს ახლობლები შემოვიდნენ და ინფორმაციის სიმწირის გამო, ემოციურ ფონზე აღელვება მოხდა. ჩვენ მადლობელი ვართ საქართველოს საგარეო საქმეთა სამინისტროსი, ხანდახან დღეში ორჯერ გვირეკავდნენ, თურქეთის საკონსულოშიც ხშირად გვეუბნებოდნენ, რომ ქართული მხარე ინტენსიურად გვკითხულობდა. სტამბულშიც საელჩოს წარმომადგენელი დაგვხვდა და გამოგვაცილა“, -განაცხადა მეზღვაურმა რაულ ტაკიძემ.

ამასთან მეზღვაურები აცხადებენ, რომ ისინი მზად არიან დავით რაზმაძის გარდაცვალებასთან დაკავშირებით მიმდინარე გამოძიებასთან ითანამშრომლონ.

„დავით რაზმაძის მეგობრები ვიყავით, ბათუმიდანაც ერთად წავედით გემზე, მის შესახებ ყველაფერი ვიცოდით, რა სტრესიც გადაიტანა 2008 წელს", -განაცხადა მეზღვაურმა მანუჩარ კეკელიძემ.