ბათუმში ელექტრომობილების მეპატრონეები შიმშილობას წყვეტენ. მათ დღეს აჭარის მთავრობის სახლში შეხვედრა გამართეს.
როგორც შეხვედრის შემდეგ ელექტრომობილების მეპატრონეებმა განაცხადეს, აჭარის მთავრობის წარმომადგენლებთან შეთანხმება შედგა.
ელექტრომობილების მეპატრონეები ამბობენ, რომ მათ მუშაობის ნებართვა დელფინარიუმის მიმდებარე ტერიტორიიდან ახალი ბულვარის ჩათვლით მიეცათ, რაც მათი განცხადებით, მისაღებია.
აღსანიშნავია, რომ ელექტრომობილების მეპატრონეები ბათუმის ძველი ბულვარის ტერიტორიაზე ვერ იმუშავებენ. აკრძალვის შესახებ გადაწყვეტილება ბათუმის საკრებულომ მიიღო, რომელსაც ინიციატივით ბათუმის ბულვარის ადმინისტრაციამ მიმართა. ბულვარის ადმინისტრაციაში აცხადებენ, რომ ელექტრომობილებით გადაადგილებისას დაშავებულ მოქალაქეთა რაოდენობა ყოველწლიურად იზრდებოდა.
შეგახსენებთ, რომ ელექტრომობილების მეპატრონეები ბათუმის ბულვარში შიმშილობდნენ და მუშაობის ნებართვას ითხოვდნენ.