ბათუმის მერია პარკირების ადგილების არამიზნობრივად და თვითნებურად დაკავებისათვის მძღოლებს აფრთხილებს. ამის შესახებ „ინტერპრესნიუსს“ ბათუმის მერიიდან აცნობეს. შპს „ბათუმის ავტოტრანსპორტმა“, მთელი ქალაქის მასშტაბით, მონიტორინგის განხორციელება დაიწყო, რომლის მიზანია თვითნებურად დაკავებული პარკირების ადგილების ავტომანქანებისაგან გათავისუფლება. კომერციული საქმიანობა პარკირების ადგილებში იკრძალება.

ბათუმის მერიის პრესსამსახურის ინფორმაციით, დამრღვევი ფიზიკური პირი ადმინისტრაციული წესით 100 ლარის, ხოლო იურიდიული პირი - 200 ლარის ოდენობით დაჯარიმდება. ავტომანქანები, რომელთა იდენტიფიკაცია ვერ მოხდება სარეგისტრაციო ნომრის არქონის გამო, გადაყვანილი იქნებიან საჯარიმო სადგომზე. შედეგად, იმ ავტომანქანების მფლობელებს, რომლებსაც გადახდილი აქვთ პარკირების საფასური, საშუალება ექნებათ სრულყოფილად ისარგებლონ მათთვის განკუთვნილი პარკირების ადგილებით.