ჩვენ არ გვქონდა ვეტოს მოლოდინი იმ პრეზიდენტისგან, რომელიც ივანიშვილმა მინიმალური თავის ტკივილისთვის გაიყვანა, - ასე გამოეხმაურა ფრაქცია "ევროპული საქართველოს" ერთ-ერთი ლიდერი გიგა ბოკერია პრეზიდენტ სალომე ზურაბიშვილის მიერ მოსამართლეების შესახებ კანონპროექტზე ხელის მოწერას.
ბოკერიას თქმით, სალომე ზურაბიშვილისგან ვეტოს მოლოდინი არავის ჰქონდა, მაგრამ მათ მოწოდებები მაინც გაავრცელეს, რადგან ყველა შესაძლო ინსტრუმენტი უნდა გამოეყენებინათ.
"მოლოდინი, რა თქმა უნდა, არ გვქონდა, მოწოდება კი აბსოლუტურად ლეგიტიმური იყო, ყველა ინსტრუმენტი უნდა გამოგვეყენებინა. ჩვენ არ გვქონია მოლოდინი პრეზიდენტის, რომელიც ამ მეთოდებით გაიყვანა ივანიშვილმა და მისმა გუნდმა“, - განაცხადა ბოკერიამ და იქვე დასძინა: „ხატოვნად რომ გითხრათ- ვეტო ამ პრეზიდენტს და ივანიშვილს უნდა გამოვუცხადოთ არჩევნებზე და მშვიდობიანი არჩევნებით შევცვალოთ ესენი".