გაერთიანებული ოპოზიციის ინფორმაციით, ზუგდიდის მერის რიგგარეშე არჩევნებს 5 000-მდე ადამიანი დააკვირდება, მათ შორის 214 კომისიის წევრი, 1500-ზე მეტი - მოხალისე და 1489 - კანდიდატის და გაერთიანებული ოპოზიციის წარმომადგენელი იქნება. ამის შესახებ ოპოზიციური პარტიის წარმომადგენელმა ლევან ბეჟაშვილმა დღეს გამართულ ბრიფინგზე ისაუბრა. მისივე თქმით, ზუგდიდში თითოეული ამომრჩევლის ხმა დაცული იქნება.

„გაერთიანებული ოპოზიცია ამ არჩევნებს არ უყურებს, როგორც რიგითი ქალაქის ხელმძღვანელის არჩევის საკითხს იმიტომ, რომ ეს ჩვენთვის ბევრად უფრო მეტია, ვიდრე რიგითი არჩევნები. ზუგდიდიდან უნდა დაიწყოს საქართველოს გამარჯვება. ზუგდიდმა უნდა აჩვენოს მთელს საქართველოს, რომ განსხვავებული აზრის, ოპოზიციური აზრის გამარჯვებით შესაძლებელია ქვეყანაში წინსვლის დაწყება. ჩვენ გვახსოვს საპრეზიდენტო არჩევნები, როდესაც ზუგდიდელებს, მთელ საქართველოს მოპარეს ხმები. ზუგდიდში 19 მაისს, კონცენტრირებული იქნება დაახლოებით 5000-მდე დამკვირვებელი, წარმომადგენელი და კომისიის წევრი, რომელიც გააკონტროლებს თითოეულ საარჩევნო უბანს“, - განაცხადა ლევან ბეჟაშვილმა.