„ქართული ოცნების“ ზუგდიდის მერობის კანდიდიატი გიორგი შენგელია თაბუკაშვილის ქუჩაზე მცხოვრებ დევნილთა ჩასახლებაში, საარჩევნო შტაბის მიერ ორგანიზებულ საფეხბურთო ტურნირს დაესწრო.
როგორც „ინტერპრესნიუსს“ პარტია „ქართული ოცნება - დემოკრატიული საქართველოს“ პრესსამსახურიდან აცნობეს, ტურნირში სულ 10 საფეხბურთო გუნდი მონაწილეობდა, მათგან პირველი ადგილი კომბინატის დევნილთა საფეხბურთო გუნდს ერგო. ტურნირს აფხაზეთის მთავრობის თავმჯდომარე, რუსლან აბაშიძე, აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრი, ქეთევან ბაკარაძე, ასევე, დევნილთა საკითხების დეპარტამენტის უფროსის მოვალეობის შემსრულებელი, მურად აბლოთია ესწრებოდნენ. გიორგი შენგელიას განცხადებით, მსგავსი ტურნირების ჩატარება მისასალმებელია, რადგან ხელს უწყობს ახალგაზრდებში ჯანსაღი ცხოვრების წესის დანერგვას.