ბათუმში, სასტუმრო „რედისონში“ აღმოსავლეთ პარტნიორობის ქვეყნების საპარლამენტო ადმინისტრაციებისთვის საპარლამენტო სწავლებისა და კომუნიკაციების შესახებ სემინარი დასრულდა. როგორც „ინტერპრესნიუსს“ აჭარის უმაღლესი საბჭოდან აცნობეს, სემინარი, დასკვნით სესიაზე საქართველოს პარლამენტისა და აჭარის ავტონომიური რესპუბლიკის უმაღლესი საბჭოს აპარატების უფროსებმა - გივი მიქანაძემ, მაია ხაჯიშვილმა და GIZ-ის წარმომადგენელმა თამარ ზოდელავამ შეაჯამეს. მათ საკანონმდებლო ორგანოებს შორის თანამშრომლობის მნიშვნელობაზე ისაუბრეს და მემორანდუმის ფარგლებში 8-თვიანი აქტივობები შეაფასეს.
სემინარის ორგანიზატორებმა თანადგომისა და მხარდაჭერისათვის, აქტიური თანამშრომლობისათვის განსაკუთრებული მადლობა გადაუხადეს აჭარის უმაღლესი საბჭოს თავმჯდომარეს დავით გაბაიძეს, აპარატის ხელმძღვანელს მაია ხაჯიშვილსა და აპარატის თანამშრომლებს.
სემინარში, რომელიც 3 დღის განმავლობაში მიმდინარეობდა, საქართველოს, ბელარუსის, უკრაინის, ლიეტუვას, მოლდოვას, სომხეთისა და აზერბაიჯანის საპარლამენტო ადმინისტრაციების ხელმძღვანელები, გერმანიის საერთაშორისო თანამშრომლობის საზოგადოების (GIZ) წარმომადგენლები და ევროპის წამყვანი ქვეყნების ექსპერტები მონაწილეობდნენ.