ჭიათურა-საჩხერის დამაკავშირებელ გზაზე, სადაც მეწყერი ჩამოწვა, ამ დრომდე გადაადგლება აკრძალულია. როგორც „ინტერპრესნიუსს“ საგანგებო სიტუაციების მართვის სამსახურში განუცხადეს, ამ დრომდე ადგილზე მიმდინარეობს გზის გაწმენდითი სამუშაოები, თუმცა სამუშაოებს დაბალი ხილვადობა აფერხებს.
უწყების პრესსამსახურის განცხადებითვე, ტერიტორიაზე მიღებულია უსაფრთხოების მაღალი ნორმები და მიმდინარეობს მუდმივი მონიტორინგი. მათივე ინფორმაციით, ტერიტორიაზე ხვალ დილით იგეგმება შესაბამისი ტექნიკის შეყვანა და ტერიტორიის გასუფთავება, რის შემდეგაც შესაძლებელი გახდება გზაზე გადაადგილება.
შეგახსენებთ, რომ ჭიათურა-საჩხერის გზაზე, მთებს შორის, მდინარის ნაპირზე მეწყერი ჩამოწვა. როგორც „ინტერპრესნიუსს“ საგანგებო სიტუაციების მართვის სამსახურში განუცხადეს, მეწყერმა ჩაკეტა ადგილზე არსებული მცირე ზომის მდინარე, რამაც წყლის დაგუბება წარმოშვა. როგორც უწყებაში განმარტავენ, მოსახლეობის ევაკუაციის აუცილებლობა არ დგას, ვინაიდან ადგილი, სადაც მეწყერი ჩამოწვა, დასახლებული პუნქტისგან დაახლოებით 2 კილომეტრშია.