თელავის მუნიციპალიტეტში სტიქიის გამო, მოსახლეობის ნაწილს სასმელი წყალი არ მიეწოდება. რამდენიმე სოფელში, უხვმა ნალექმა წყლის სათავე ნაგებობები დააზიანა. სტიქიის ზონაში კი ტექნიკის შეყვანა ამ დრომდე ვერ ხერხდება.

თელავის მერიის ინფორმაციით, გადაუღებელი წვიმა დაზიანებული წყლის სისტემის ზუსტი მდებარეობის პოვნას და მუშაობის დაწყებას ართულებს.

შოთა ნარეკლიშვილი არ გამორიცხავს, რომ საჭიროების შემთხვევაში მოსახლეობას წყალი ცისტერნებით მიაწოდონ.

ამასთანავე, თელავის მუნიციპალიტეტში კვლავ ადიდებულია მდინარე სტორი და რამდენიმე მიმართულებით მიედინება.