სიღნაღს ჩინეთის დელეგაცია ეწვია
12 მაისს, სიღნაღის მუნიციპალიტეტს ჩინეთის ქალაქ ტიანძინიდან დელეგაცია ეწვია, რომელთა შემადგენლობაშიც სავაჭრო და კომერციული პალატის და ტიანძინში არსებული თავისუფალი ეკონომიკური ზონის TEDA-ს ხელმძღვანელები იყვნენ. ჩინეთიდან ჩამოსული სტუმრები სიღნაღის მუნიციპალიტეტის მერს გიორგი გოგილაშვილს შეხვდნენ და სამომავლო თანამშრომლობის საკითხები, ასევე, სიღნაღის მუნიციპალიტეტის საინვესტიციო პოტენციალი განიხილეს.
როგორც „ინტერპრესნიუსს“ სიღნაღის მუნიციპალიტეტიდან აცნობეს, ოფიციალური შეხვედრის შემდეგ ჩინელმა სტუმრებმა ქალაქი სიღნაღი დაათვალიერეს, გაეცნენ ღირშესანიშნაობებს, მოინახულეს მუზეუმი, ასევე, ბოდბის წმინდა ნინოს სახელობის მონასტერს ეწვივნენ.
ვიზიტის დასასრულს, დელეგაცია სოფელ მაღაროში მცხოვრებ აბრეშუმის მწარმოებელ ლამარა ბეჟაშვილსაც ესტუმრა.
