გორი ტურისტული სეზონისთვის ემზადება. გორის მუნიციპალიტეტის ინფორმაციით, მოწესრიგებული ინფრასტრუქტურა და გალამაზებული გარემო ქალაქში კიდევ უფრო მეტი ტურისტის შემოსვლას შუწყობს ხელს.

მათივე ცნობით, საგაზაფხულო სამუშაოები ქალაქის ცენტრში დღეს გორის მუნიციპალიტეტის მერმა კონსტანტინე თავზარაშვილმა შიდა ქართლის რწმუნებულთან გიორგი ხოჯევანიშვილთან ერთად დაათვალიერა.

„საგაზაფხულო სამუშაოების ფარგლებში მიმდინარეობს სკვერების მოწესრიგება და გამწვანება. ქალაქის ცენტრში დაირგო ყვავილები, მოითიბა ბალახი, შეიღება და რეაბილიტაცია ჩაუტარდა მოაჯირებსა და ბორდიულებს. აქტიურად ხორციელდება მიწისქვეშა გადასასვლელების მოწესრიგებაც. ქალაქის ცენტრში , ფოსტის მიმდებარედ განლაგდა განახლებული დეკორატიული ქოთნები, სადაც დაირგო სხვადასხვა ჯიშის ყვავილები. სეზონური ყვავილები, მათ შორის ბეგონია, პეტუნია, პორტულაკი, სალვია და გაზანია დაირგო ბარათაშვილის, საბრძოლო დიდების და სტალინის სახლმუზეუმების მიმდებარე სკვერებში, ასევე გორის კულტურისა და დასვენების პარკში. მრავალწლოვანი ხეების ძირში, ნიადაგი დაიფარა წითელი მულჩით“, - აღნიშნულია გორის მუნიციპალიტეტის ინფორმაციაში.

ცნობისთვის, სამუშაოებს ქალაქში მერიის კეთილმოწყობის სააგენტოს თანამშრომლები ახორციელებენ.