ზუგდიდის საკრებულოს თავმჯდომარე ოპოზიციის მოთხოვნაზე - არ არსებობს სამართლებრივი საფუძვლები, რომ დეპუტატ გია დანელიას შეუწყდეს უფლებამოსილება

კიდევ ერთხელ ცდილობდნენ პოლიტიკური შოუს დადგმას, არანაირი პრობლემა არ იყო ზუგდიდის საკრებულოში ოპოზიციის წარმომადგენლების შესვლა და განცხადების დარეგისტრირება, რაც საბოლოო ჯამში მოხდა. ამის შესახებ ჟურნალისტებს ზუგდიდის საკრებულოს თავმჯდომარემ მამუკა წოწერიამ განუცხადა.

„ ნაციონალური მოძრაობა“ დარწმუნდა, რომ ისინი აგებენ არჩევნებს და ამიტომ ცდილობენ პოლიტიკური ტემპერატურის აწევას. არ არსებობს სამართებლივი საფუძვლები, რომ დეპუტატს უფლებამოსილება შეუწყდეს და ჩვენ არ გავყვებით „ნაციონალური მოძრაობის“ ხელწერას - დაუმტკიცებლად დაუდასტურებლად ვინმეს მოვთხოვოთ პასუხი“, - აცხადებს წოწერია.

დღეს გაერთიანებულმა ოპოზიციამ ზუგდიდის საკრებულოს მიმართა წერილით, რომლის თანახმად, „რუსთავი 2“-ში გასულ ჩანაწერთან დაკავშირებით, გამოძიების დასრულებამდე, საკრებულოს დეპუტატ გია დანელიას უნდა შეწყვეტოდა უფლებამოსილება. გაერთიანებული ოპოზიციის წარმომადგენლების ზუგდიდის სამხარეო ადმინისტრაციის შენობაში მისვლას, სადაც საკრებულო მდებარეობს, ხმაური და სიტყვიერი დაპირისპირება მოჰყვა.