გაერთიანებული ოპოზიციის წარმომადგენლები ზუგდიდის საოლქო კომისიის სხდომას დაესწრებიან და კომისიის თავმჯდომარის საკითხს დააყენებენ
#67 ზუგდიდის საოლქო საარჩევნო კომისიის სხდომას, რომელიც 11:00 გაიმართება, გაერთიანებული ოპოზიციის წარმომადგენლები დაესწრებიან.
მათი თქმით, ისინი საოლქო კომისიის თავმჯდომარის გადაყენების საკითხს დააყენებენ.
როგორც გაერთიანებულ ოპოზიციაში აცხადებენ, კომისიის წევრებს იმ ვიდეო მასალას წარუდგენენ, სადაც მათივე მტკიცებით, ასახულია თუ რა პირობებში ინახებოდა საოლქოდან უბნებზე გაცემული ბეჭდები. გაერთიანებული ოპოზიციის ერთ-ერთი ლიდერის, ხატია დეკანოიძის განმარტებით, ბეჭდები კომისიის თავმჯდომარეებს სახლში ჰქონდათ და არა უბნებზე.
„აღმოვაჩინეთ სერიოზული დარღვევები. საოლქო კომისიის თავმჯდომარე გვიმტკიცებდა იმას, რომ ბეჭდები იყო უბნებზე დალუქულ მდგომარეობაში, თუმცა როგორც აღმოვაჩინეთ კომისიის თავმჯდომარეებს ბეჭდები ჰქონდათ სახლში, რაც ამტკიცებს იმას, რომ ისინი არ იყო უსაფრთხოდ შენახული", - ამბობს დეკანოიძე.
საოლქო კომისიის სხდომაზე, რომელსაც გაერთიანებული ოპოზიციის წარმომადგენლები დაესწრებიან, სპეციალური სიების დამტკიცებაზე უნდა იმსჯელონ.
