2018 წელს პირველად დაფიქსირდა, რომ დაქირავებულთა რაოდენობამ თვითდასაქმებულებს გადააჭარბა. ამის შესახებ საქსტატის სტატისტიკურ მონაცემებშია აღნიშნული, რომელიც ქვეყანაში უმუშევრობის დონეს ეხება. მონაცემების თანახმად, 2018 წელს 2017 წელთან შედარებით 2.5 პროცენტითაა გაზრდილი დაქირავებულთა წილი დასაქმებულებში.
„2018 წელს დაქირავებულთა წილი დასაქმებულებში 50.8 პროცენტს შეადგენდა, რაც 2.5 პროცენტული პუნქტით არის გაზრდილი წინა წელთან შედარებით. უნდა აღინიშნოს, რომ ბოლო ხუთი წლის განმავლობაში თვითდასაქმებულთა კლების ტენდენცია ფიქსირდება და 2018 წელს პირველად, დაქირავებულთა რაოდენობამ გადააჭარბა თვითდასაქმებულებს.
უმუშევრობის დონე გაცილებით დაბალია სასოფლო დასახლებებში, საქალაქო დასახლებებთან შედარებით. 2018 წელს წინა წელთან შედარებით უმუშევრობის დონე საქალაქო დასახლებებში 3.5 პროცენტული პუნქტით არის შემცირებული, ხოლო სასოფლო დასახლებებში გაზრდილია 0.7 პროცენტული პუნქტით“, - აღნიშნულია სტატისტიკის ეროვნული სამსახურის მონაცემებში.