რუსთველმა მიტროპოლიტმა იოანემ, ეპარქიის სამღვდელოებასთან ერთად, ოჯახების საკეთილდღეოდ თავისუფლების მოედანზე პარაკლისი გადაიხადა. პარაკლისს ქვემო ქართლის გუბერნატორი შოთა რეხვიაშვილი, რუსთავის მერი ირაკლი ტაბაღუა, ქალაქის საკრებულოს დეპუტატები, ჩოხოსანთა საზოგადოების წევრები და რუსთავში მოქმედი ტაძრების მრევლი დაესწრო. ამის შესახებ „ინტერპრესნიუსს“ რუსთავის მერიიდან აცნობეს.
„ოჯახის სიწმინდის დღე მინდა მივულოცო ჩემს თანამოქალაქეებს, მთელ საქართველოს. ოჯახი ჩვენთვის წმინდაა და ყველა ადამიანისთვის, ვისაც ოჯახი აქვს და ვინც ოჯახს უფრთხილდება, ეს არის ღვთისგან ბოძებული და მინიჭებული უდიდესი მადლი. ქართველებისთვის და საქართველოსთვის ძალიან მნიშვნელოვანია პატრიარქის ლოცვა-კურთხევით, ამ დღის დაწესება. კიდევ ერთხელ მივესალმები და ვულოცავ ყველას ოჯახის სიწმინდის დღეს“, - განაცხადა ჟურნალისტებთან საუბარში რუსთავის მერმა ირაკლი ტაბაღუამ.
მათივე ცნობით, დღესვე, რუსთავის ხელოვნების სკოლის წინ არსებულ სკვერში, ბავშთა ნამუშევრების თემატური გამოფენა და კონცერტი გაიმართა.
„ღონისძიებების დასრულების შემდეგ, სასულიერო პირები, ჩოხოსანთა საზოგადოების წევრები და მრევლი, თბილისში გაემგზავრნენ, სადაც ოჯახის სიწმინდის დღესთან დაკავშირებით გამართულ სახალხო მსვლელობაში მიიღებენ მონაწილეობას“, - აღნიშნულია რუსთავის მერიის მიერ გავრცელებულ ინფორმაციაში.