სააკაშვილისთვის მთავარი არის საქართველო და უკრაინაში დაბრუნება ნიშნავს მის საქართველოში დაბრუნების დაჩქარებას, - ამის შესახებ ფრაქცია "ნაციონალური მოძრაობის" თავმჯდომარემ რომან გოცირიძემ ჟურნალისტებთან საუბრისას განაცხადა.
რომან გოცირიძის განცხადებით, თუ საჭირო გახდება მიხეილ სააკაშვილი უკრაინის პოლიტიკაში ჩაერთვება. გოცირიძე აღნიშნავს, რომ ზელენსკის მიერ მიღებული გადაწყვეტილებით, "ქართული ოცნებას" ახალი ტკივილი გაუჩნდა.
„მიხეილ სააკაშვილის უკრაინაში დაბრუნება მნიშვნელოვანი გზავნილია უკრაინის პრეზიდენტის მხრიდან მსოფლიოს თანამეგობრობისადმი. ზელენსკი მოიქცა სამართლიანად და ის ააშენებს სამართლებრივ სახელმწიფოს და არა ოლიგარქიულ სახელმწიფოს, რაც იყო აქამდე. რაც შეეხება საქართველოს, ახალი ტკივილი გაჩნდა "ქართული ოცნებისთვის" და უკვე დაიწყეს უგუნური განცხადებების გაკეთება. თუ საჭირო გახდება, სააკაშვილი იქნება უკრაინის პოლიტიკაში, მაგრამ სააკაშვილისთვის მთავარი არის საქართველო და უკრაინაში დაბრუნება ნიშნავს მის საქართველოში დაბრუნების დაჩქარებას", - განაცხადა რომან გოცირიძემ.