გორის მუნიციპალიტეტსა და სალაცგრივას მუნიციპალიტეტს შორის გაფორმებული ურთიერთთანამშრომლობის მემორანდუმის ფარგლებში პირველ საპროექტო იდეას საფუძველი უკვე ჩაეყარა. აღნიშნულის შესახებ „ინტერპრესნიუსს“ გორის მერიიდან აცნობეს.

მათივე ინფორმაციით, ლატვიის საგარეო საქმეთა სამინისტროს, სალაცგრივას მუნიციპალიტეტის და გორის მუნიციპალიტეტის მიერ შემუშავებულ ერთობლივ პროექტს ლატვიელი მხარე ევროკომისიის მიერ გამოცხადებულ საგრანტო კონკურსში წარადგენს, საერთო პროექტის მთავარი მიზანი გორის მუნიციპალიტეტისათვის გამოცდილების გაზიარება იქნება.

გორის მერიის ცნობით, ლატვიის დელეგაციის წევრები ვიზიტისას, ახალ საპროექტო იდეებზე მუშაობასთან ერთად, 26 მაისის ღონისძიებებს დაესწრნენ, გაეცვნენ გორში მიმდინარე ინფრასტრუქტურული პროექტებს, საგანმანათლებლო სისტემის მოდელს სკოლებსა და ბაღებში, დაათვალიერეს „კულას“ საწარმო, მუზეუმები და კულტრურულ-საგანმანათლებლო დაწესებულებები. ვიზიტის დასასრულს სალაცგრივას მუნიციპალიტეტის მერი გორის დემოკრატიის სკოლის მსმენელებს შეხვდა.