ბათუმის საკრებულოს სხდომაზე „ქართული ოცნების" წევრის, ომარ მახარაძის უფლებამოსილების შეწყვეტის საკითხზე კენჭისყრა გაიმართა.
ბათუმის საკრებულოს იურიდიული კომიტეტის თავმჯდომარე „ქართული ოცნების" წევრი თემურ კახიძე გახდა, მას საკრებულოს უმრავლესობამ მხარი დაუჭირა. თემურ კახიძემ „ქართული ოცნების" წევრი ომარ მხარაძე ამ თანამდებობაზე ჩაანაცვლა.
ბსუ-ს ყოფილმა ლექტორმა ბათუმის საკრებულოში ფრაქცია "ქართული ოცნება- მრეწველები" დატოვა, რის შედეგადაც ფრაქციაც დაიშალა.
ომარ მახარაძემ ფრაქციის დატოვების შესახებ განცხადებით ბათუმის საკრებულოს რამდენიმე დღის წინ თავად მიმართა. იგი დღევანდელ სხდომას არ დასწრებია.
შეგახსენებთ, რომ ბსუ-ს ყოფილ ლექტორს ომარ მახარაძეს საკუთარი სტუდენტი სექსუალურ შევიწროებაში ადანაშაულებს. ფაქტზე გამოძიება მიმდინარეობს, საგამოძიებო ორგანომ მხარეები გამოკითხეს.