საპარლამენტო ოპოზიცია ინტერპელაციასთან დაკავშირებულ პროცედურას და ბიუროს მიერ დამტკიცებულ გამომსვლელთა გრაფიკს აპროტესტებს.
პარლამენტის პლენარული სხდომა სწორედ ამ თემაზე კამათით დაიწყო. დეპუტატების შეფასებით, არასწორად ხდება ინტეპელაციის დროების განსაზღვრა, როცა ინტერპელაციის დრო კითხვების რაოდენობის მიხედვით იყოფა.
ოპოზიციონერი პარლამენტის წევრები გამოსვლის დროის გაზრდას ითხოვენ და ამბობენ, რომ წინააღმდეგ შემთხვევაში, ინტერპელაცია ყოველგვარ აზრს კარგავს.
“ძალიან უცნაურად გამოიყურება, როცა პარლამენტის წევრს საკუთარი პოზიციის დასაფიქსირებლად 1.30 წუთი აქვთ - იმაზე რომ არაფერი ვთქვათ, რომ შეკითხვებზე პასუხების გასაცემად მოსულ პრემიერ-მინისტრს ჯამში 7.30 წუთი აქვს. ეს ძალიან უხერხულია და ინტერპელაცია აზრს კარგავს“, - განაცხადა ხათუნა გოგორიშვილმა.
დეპუტატ ლევან გოგიჩაიშვილის აზრით კი, ფრაქცია “ქართულმა ოცნებამ“ დღევანდელ ინტერპელაციაზე ჯანდაცვის მინისტრი დავით სერგეენკო სპეციალურად დაიბარა, რათა გამომსვლელთა დრო შემცირებულიყო.
გოგიჩაიშვილმა ინტერპელაციაზე მიწვეულ მამუკა ბახტაძეს მოსთხოვა გაგზავნილ კითხვებზე პასუხების გარდა პანკისის მოვლენებზე, ეკონომიკის მინისტრის მოხსნასა და ახლის დანიშვაზე, ასევე ფოთის პორტთან დაკავშირებით მიღებულ გადაწყვეტილებაზე ისაუბროს.