ეკონომიკისა და მდგრადი განვითარების მინისტრმა ნათია თურნავამ სამეგრელო - ზემო სვანეთის სახელმწიფო რწმუნებულთან ალექსანდრე მოწერელიასთან და გაზის ტრანსპორტირების კომპანიის დირექტორთან, ჯაბა ხმალაძესთან ერთად, წალენჯიხის მუნიციპალიტეტში მიმდინარე გაზიფიცირების სამუშაოები დაათვალიერა. ამის შესახებ „ინტერპრესნიუსს“ ეკონომიკისა და მდგრადი განვითარების სამინისტროდან აცნობეს.
მათი ინფორმაციით, ეკონომიკის მინისტრი წალენჯიხაში ადგილობრივ მოსახლეობას შეხვდა და მათ მუნიციპალიტეტის გაზიფიცირების პროცესში დაგეგმილი სამუშაოების დეტალები გააცნო.
ნათია თურნავას ინფორმაციით, წალენჯიხის მუნიციპალიტეტში, 3-წლიანი გეგმის ფარგლებში 13 სოფელი გაზიფიცირდება.
„დღეს, შეიძლება ითქვას, რომ ისტორიული დღეა წალენჯიხისთვის, რადგან აქ ისტორიულად არასოდეს ყოფილა ბუნებრივი აირი. ჩვენ შემოდგომაზე ვიყავით აქ ჩამოსულები, პირადად მე შევხვდი ადგილობრივ მოსახლეობას და დავპირდი, რომ სულ მალე დაიწყებოდა გაზიფიცირების სამუშაოები. ამ დანაპირებს ვასრულებთ.
მთავრობამ დაამტკიცა 3-წლიანი გეგმა და სულ რამდენიმე დღის წინ ეს სამუშაოებიც დაიწყო. ეს ნიშნავს, რომ მომავალ წელს, გათბობის სეზონის დადგმომამდე, ანუ ზაფხულის მიწურულს 3000-მდე წალენჯიხელს, ოჯახს სახლებში ბუნებრივი აირი ექნება “, - განაცხადა ნათია თურნავამ.
პროექტის ფარგლებში, წალენჯიხის მუნიციპალიტეტში მოეწყობა გაზგამანაწილებელი სადგური, აიგება 39 675 მეტრი მაღალი წნევის მკვებავი და ქსელის მოწყობისათვის საჭირო 132 597 მეტრი სიგრძის მქონე გაზსადენი. პროექტის დასრულების შემდეგ 2 897 აბონენტი შეძლებს ბუნებრივი გაზის საერთო ქსელში ჩართვას.
2019 – 2021 წლებში საქართველოს გაზიფიცირების სამთავრობო გეგმის თანახმად, ეკონომიკისა და მდგრადი განვითარების სამინისტროს ჩართულობით, საქართველოს მასშტაბით 226 დასახლებული პუნქტის გაზიფიცირება მოხდება, საიდანაც 75 - სამეგრელოშია.