აჭარის განათლების, კულტურისა და სპორტის მინისტრად მაია ხაჯიშვილი დაინიშნა. იგი აქამდე აჭარის უმაღლესი საბჭოს აპარატის უფროსად მუშაობდა. აჭარის მთავრობის თავმჯდომარის, თორნიკე რიჟვაძის თქმით, მაია ხაჯიშვილი 2005 წლიდან განათლების სამინისტროს იურიდიული სამსახურის უფროსი იყო, ასევე ამავე უწყების შესყიდვებისა და სამართლებრივი უზრუნველოფის დეპარტამენის ხელმძღვანელად მუშაობდა. თორნიკე რიჟვაძემ აჭარის მთავრობაში სხვა საკადრო ცვლილებებიც დააანონსა.

„მას გავლილი აქვს ყველა ეტაპი, რომელიც საჭიროა განათლების სამინისტროს ეფექტური მუშაობისთვის", - განაცხადა თორნიკე რიჟვაძემ.

შეგახსენებთ, რომ 8 ქვეყნის წარმომადგენლებმა 26 მაისის დღესასწაულთან დაკავშირებით ბათუმში, აბაშიძის ქუჩაზე მსვლელობა მოაწყვეს. მათ შორის რუსეთის წარმომადგენლებიც იყვნენ ერთ-ერთი ანსამბლის სახით. მათ მიერ რუსეთის დროშების ფრიალს მოქალაქეთა პროტესტი მოჰყვა. აღნიშნული ფაქტის შემდეგ, აჭარის განათლების, კულტურისა და სპორტის ყოფილი მინისტრი ინგა შამილიშვილი თორნიკე რიჟვაძემ გაათავისუფლა.