ქუთაისის საკრებულოს თავმჯდომარის, ნიკა ლატარიას განცხადებით, ნანა კოსტავასთან ერთად საკრებულოში მუშაობას არ აპირებს და შესაძლოა, მან თავად დატოვოს ფრაქცია "ქართული ოცნება-კონსერვატორები", რომელშიც ნანა კოსტავა ამ დრომდე რჩება. როგორც ნიკა ლატარიამ განმარტა, საკრებულოში კოსტავას გაშვების ბერკეტი არ აქვთ.
„საკრებულოს არ გვაქვს არანაირი ბერკეტი, რომ ვაიძულოთ დეპუტატი დატოვოს საკრებულო, გარდა ამისა, მან დატოვა საკრებულოში თანამდებობა და ვიმეორებ ჩემს სიტყვებს, მე არ ვაპირებ, მასთან იმ ფორმატში მუშაობას, როგორც ვმუშაობდი. ამ დღეებში ფრაქცია შევიკრიბებით და ერთად გადავწყვეტთ, მე დავტოვებ ფრაქციას, თუ ის. დანარჩენი ჰკითხეთ ნანა კოსტავას, თუ რა გადაწყვეტილებას იღებს ერთ დღეს და მეორე დღეს ცვლის", - განაცხადა ნიკა ლატარიამ.
მისი თქმით, დეპუტატის გაშვების უფლებამოსილება მოსახლეობას აქვს და საზოგადოებამ უნდა უთხრას დეპუტატს უარი. რაც შეეხება კომუნიკაციას ნანა კოსტავასთან, ამბობს, რომ პარასკევის შემდეგ კომუნიკაცია არ ჰქონია.
შეგახსენებთ, ნანა კოსტავამ აქციების შემდეგ საკრებულოს შესაძლო დატოვების შესახებ განაცხადა, თუმცა ამ დრომდე გადაწყვეტილება არ მიუღია.
შეგახსენებთ, ნანა კოსტავამ სიძულვილის შემცველი პოსტი 28 მაისს დაწერა, რასაც მის წინააღმდეგ აქციები მოჰყვა.