ვარძია ახალგაზრდა არქეოლოგთა საერთაშორისო კონფერენციას მასპინძლობს

„ვარძიის სამონასტრო კომპლექსი მეთერთმეტედ მასპინძლობს ახალგაზრდა არქეოლოგთა საერთაშორისო კონფერენციას, რომელშიც თბილისის სახელმწიფო უნივერსიტეტის სტუდენტებთან ერთად მსოფლიოს წამყვანი უნივერსიტეტების წარმომადგენლები მონაწილეობენ.

კონფერენცია არქეოლოგიის ერთ-ერთ ფუძემდებელს პიტ რივერსს ეძღვნება და მასში ევროპის 15 უნივერსიტეტი მონაწილეობს, მათ შორის - ავსტრიიდან, გერმანიიდან, პოლონეთიდან ინგლისიდან. კონფერენციაზე მონაწილეებმა ინდივიდუალური, უახლესი სამეცნიერო კვლევები წარმოადგინეს ნეოლითიდან მოყოლებული გვიანი შუასაუკუნეების ჩათვლით. ასევე, განიხილეს მსოფლიოს სხვადასხვა რეგიონის არქეოლოგიური კვლევის საკითხები”, - ამის შესახებ „ინტერპრესნიუსს“ თბილისის სახელმწიფო უნივერსიტეტიდან აცნობეს.

მათივე ინფორმაციით, კონფერენციის გახსნას თსუ-ს რექტორის მოადგილე ნინო გვენეტაძე, თსუ-ს ჰუმანიტარულ მეცნიერებათა ფაკულტეტის არქეოლოგიის სასწავლო კვლევითი ინსტიტუტის ხელმძღვანელი ვახტანგ ლიჩელი, ოქსფორდის უნივერსიტეტის პროფესორი მაიკლ ვიკერსი, უცხოელი და ქართველი პროფესორები, სტუდენტები და მოწვეული სტუმრები ესწრებოდნენ.

„კონფერენციაში ქართველ ახალგაზრდა არქეოლოგებთან ერთად მონაწილეობას იღებენ სხვადასხვა ქვეყნის ახალგაზრდა არქეოლოგები, მომავალი მეცნიერები. მათ საქართველოსთან დაკავშირებით მნიშვნელოვანი არქეოლოგიური ძიებების შესახებ ძალიან საინტერესო მოხსენებები აქვთ. ეს საუკეთესო საშუალებაა ამ დარგში არსებული სიახლეების გაცნობისა და ურთიერთგაზიარებისთვის. ვიმედოვნებ, ეს ტრადიცია გაგრძელდება, და კიდევ უფრო განვითარდება,“ - განაცხადა თსუ-ს რექტორის მოადგილემ ნინო გვენეტაძემ.

კონფერენციაზე სიტყვით გამოსვლისას კვლევითი ინსტიტუტის ხელმძღვანელმა ვახტანგ ლიჩელმა კონფერენციის მნიშვნელობაზე ისაუბრა. „ვარძიის ყოველწლიური საერთაშორისო კონფერენცია დიდი პოპულარობით სარგებლობს ევროპისა და ამერიკის უნივერსიტეტებში და მასში მსოფლიოში ცნობილი არქეოლოგები მონაწილეობენ. „კონფერენციას ძალიან მნიშვნელოვანი შედეგები აქვს - ჩვენი სტუდენტები უკვე მრავალი წელია, რაც უცხოეთის არქეოლოგიურ ექსპედიციებში მონაწილეობენ, ისინი თვითონ აწარმოებენ არქეოლოგიურ კვლევას საქართველოს ფარგლებს გარეთ, რისი პრაქტიკაც აქამდე არ ყოფილა საქართველოში,“ - აღნიშნა ვახტანგ ლიჩელმა.

ვარძიის ყოველწლიურ საერთაშორისო კონფერენციას ოქსფორდის უნივერსიტეტის პროფესორი მაიკლ ვიკერსი უძღვება, რომელიც 11 წელია რაც კონფერენციის აქტიური მონაწილეა. „კონფერენცია დაიწყო თბილისის სახელმწიფო უნივერისტეტის ერთ-ერთ აუდიტორიაში 11 წლის წინ. პროექტის იდეა იყო, რომ ქართველი სტუდენტებისთვის მიგვეცა შანსი 15 წუთის განმავლობაში საკუთარი კვლევების შესახებ ინგლისურად ელაპარაკათ. წლების განმავლობაში სტანდარტები უფრო გამყარდა. შეუძლებელია განასხვაო ქართველი არქეოლოგიის სტუდენტები და ოქსფორდის, მიჩიგანის ან ვარშავის ეთნოგრაფიის სტუდენტები ერთმანეთსაგან,“ - განაცხადა პროფესორმა.

საბოლოოდ კონფერენციაზე სიტყვით თსუ-ს სტუდენტი დავით ნასყიდაშვილიც გამოვიდა „კონფერენციამ საშუალება მომცა არა ერთ ქვეყანაში, მახლობელ აღმოსავლეთსა თუ ევროპაში არქეოლოგიურ კვლევებსა და გათხრებში მიმეღო მონაწილეობა და შემდგომ ეს ყველაფერი წარმედგინა აუდიტორიისათვის, რომელიც ჩემი აზრით, ძალიან დიდი მნიშვნელობისაა,“ - აღნიშნა თსუ-ს სტუდენტმა დავით ნასყიდაშვილმა, რომელიც კონფერენციის ერთ-ერთი ორგანიზატორი და აქტიური მონაწილეა.

კონფერენცია 4 ივნისს დასრულდება. მისი მსვლელობის დროს, გაიმართა დისკუსიები არქეოლოგიასა და მომიჯნავე დარგებში განხორციელებული კვლევების შესახებ, დაისახა სამეცნიერო პრობლემათა გადაწყვეტის გზები.

ვარძიის ყოველწლიური საერთაშორისო კონფერენციის მიზანია, ხელი შეუწყოს სხვადასხვა ქვეყნის წარმომადგენელ ახალგაზრდა არქეოლოგთა შორის კონტაქტების დამყარებას, მათი კვლევების პოპულარიზაციას მსოფლიო სამეცნიერო ბაზარზე და, შესაბამისად, ქართველი სტუდენტი-არქეოლოგების საერთაშორისო სივრცეში ინტეგრაციას.

გიორგი ანთაძე - საქართველომ რეგიონში არსებული სამხედრო დისბალანსის გათვალისწინებით, თავისი თავდაცვის შესაძლებლობების გაუმჯობესებისკენ უფრო ქმედითი ნაბიჯები უნდა გადადგას
ქართული პრესის მიმოხილვა 03.08.2020
ალექსანდრე თვალჭრელიძე -  გაბრაზებული ამომრჩევლები ხმას მცირე პარტიებს მისცემენ, პარლამენტის გასაღები სწორედ მცირე პარტიების და  ახალი სახეების ხელშია
მარტივი, უსაფრთხო და მოქნილი Apple Pay ციფრული საფულე პროკრედიტ ბანკის მომხმარებლებისთვის!
HR ბიზნეს სამიტი HR hub-ის ორგანიზებითა და PSP დაზღვევის მხარდაჭერით წარმატებით ჩატარდა
"მეამას" შენობა მსოფლიოში საუკეთესო სამუშაო სივრცედ დასახელდა
„ციტადელი“ მომხმარებელს ახალ შოურუმში ეპატიჟება
როგორ ვისარგებლოთ თიბისი ფეის აპლიკაციით
კრედო ბანკსა და ევროპის საინვესტიციო ბანკს შორის მიკრო, მცირე და საშუალო ბიზნესების ხელშესაწყობად 36 მილიონი ლარის მოცულობის საფინანსო ხელშეკრულება გაფორმდა