ბათუმში მუსლიმი მრევლი რამზან ბაირამს აღნიშნავს. მომლოცველები ბათუმის ორთა ჯამეში და ასევე აბაშიძის ქუჩაზეც შეიკრიბნენ, სადაც მეჩეთის აშენებას ითხოვენ. მორწმუნეები დღესასწაულამდე 30 დღის განმავლობაში მარხულობენ.

დღესასწაულზე მუსლიმი მრევლი წინაპრების საფლავებზე მიდის და ერთმანეთს ტკბილეულით უმასპინძლდება. მორწმუნეების თქმით, სადღესასწაულო ლოცვა დილით მზის ამოსვლის დროს ერთდროულად ყველა მეჩეთში სრულდება.

ბათუმის ორთა ჯამეში საქართველოს მუფთმა ბეგლარ ქამაშიძემ სადღესასწაულო ლოცვა აღავლინა, რომელსაც აჭარის მთავრობის თავმჯდომარე თორნიკე რიჟვაძე და სხვა ოფიციალური პირები ესწრებოდნენ.

აღსანიშნავია, რომ მუსლიმმა მრევლმა ყურადღება აბაშიძის ქუჩაზე ახალი მეჩეთის მშენებლობის საკითხზეც გაამახვილა. მათი თქმით, ძველ ბათუმში არსებული ორთა ჯამე მომლოცველებს ვერ იტევს.