მიმდინარეობს საგამოძიებო მოქმედებები, დაინიშნება ექსპერტიზები, რის შემდეგაც ცნობილი გახდება ვერტმფრენის ჩამოვარდნის მიზეზი, - ამის შესახებ შინაგან საქმეთა სამინისტროს საპატრულო პოლიციის დეპარტამენტის მცხეთა-მთიანეთის მთავარი სამმართველოს უფროსმა, ვასილ პეტრიაშვილმა, ყაზბეგში ვერტმფრენის ჩამოვარდნასთან დაკავშირებით ჟურნალისტებს განუცხადა.
„მომხდარი შემთხვევის შედეგად ადგილზე გარდაცვლილია 3 ადამიანი - პილოტი, პილოტის დამხმარე და სასტუმრო "რუმს ჰოტელ ყაზბეგის" თანამშრომელი. ადგილზე მობილიზებულია ყველა სამსახური, მიმდინარეობს საგამოძიებო მოქმედებები, დაინიშნება ექსპერტიზები და ექსპერტიზების პასუხის შემდეგ, ცნობილი გახდება მიზეზი, თუ რის გამო ჩამოვარდა ვერტმფრენი. გამოძიება მიმდინარეობს სისხლის სამართლის კოდექსის 275-ე მუხლის შესაბამისად,“ - განაცხადა ვასილ პეტრიაშვილმა.