ხარაგაულში სტიქიისგან მიყენებულ ზარალს ითვლიან. მერიის ინფორმაციით, ამ დროისათვის არსებული მონაცემებით ზარალი, სავარაუდოდ, მილიონ ლარს აჭარბებს. სტიქიის ზონაში სალიკვიდაციო სამუშაოები გრძელდება.

„შლამისგან გაწმენდილია სოფელ ლეღვანიდან სოფელ მარელისის კაპნარი-კელასოურის უბანში შემავალი ხიდი. ამავე უბანში აღდგენილია გზა, რომლითაც იქამდე ისარგებლებს მოსახლეობა, ვიდრე დიდვაკე-ლეღვანის დამაკავშირებელი გზა არ აღდგება", -აცხადებენ ხარაგაულის მერიაში.

გვიან ღამით მოსულმა უხვმა ნალექმა ხარაგაულის სოფლები მარელისი, ლეღვანი და დიდვაკე დააზარალა. წაღებულია გზები და ჩანგრეულია ხიდები. დატბორილია საცხოვრებელი სახლების ეზოები. აბონენტების ნაწილს ელექტოენერგია არ მიეწოდება. სტიქიის ზონაში იმყოფებოდნენ იმერეთის გუბერნატორის პირველი მოადგილე და ხარაგაულის მერი.