დილიდან უბნებზე მასობრივი კანონდარღვევები დაიწყო, - ამის შესახებ „ევროპული საქართველოს" წევრმა ელენე ხოშტარიამ ჟურნალისტებს ცენტრალურ საარჩევნო კომისიაში განუცხადა. ოპოზიციის წარმომადგენელთა განცხადებით, საარჩევნო უბნებზე პლანშეტის მეშვეობით არ ხდება იმის გადამოწმება, არიან თუ არა ამომრჩევლები აღნიშნულ უბანზე რეგისტრირებულნი.
მათი მტკიცებით, ნაკადის მომწესრიგებელმა უნდა შეამოწმოს სიები.
ბლოკ "ევროპული საქართველო - თავისუფალი დემოკრატების" წევრები ელენე ხოშტარია და ნინო გოგუაძე ცესკოს თავმჯდომარე თამარ ჟვანიასთან შეხვედრას ითხოვენ.
"დილიდან უბნებზე მასობრივი კანონდარღვევები დაიწყო. აბსოლუტურად ყველა ადამიანი, ვინც საარჩევნო უბანზე მიდის, სიაში უნდა გადამოწმდეს, რათა ვიცოდეთ, არის თუ არა იგი იმ უბნის ამომრჩეველი. შესაბამისად, იმისთვის, რომ ეს მომხდარიყო არეულობის გარეშე, წინასწარ შედგა ჩვენი პარტიის წევრების შეხვედრა ცესკოს თავმჯდომარესთან და შევთანხმდით, რომ ცესკო უზრუნველყოფდა ბევრ პლანშეტს ამომრჩეველთა გადასამოწმებლად. დილიდან პირადად ვიყავი რამდენიმე უბანზე და ასევე, სხვადასხვა უბნებიდან მოგვდის ინფორმაცია, რომ საერთოდ არ იყენებენ პლანშეტებს, რათა გადამოწმდნენ უბანზე მისული ადამიანები. უბრალოდ იგნორირებას უკეთებენ. ახლა ამ კითხვებზე პასუხის გაცემა ცენტრალურ საარჩევნო კომისიის თავმჯდომარეს მოუწევს",- განაცხადა ელენე ხოშტარიამ.