თუშეთის მიმართულებით, პრობლემურ მონაკვეთზე მაღალი გამავლობის ავტომობილით გადაადგილება შესაძლებელი გახდა. სტიქიის შემდეგ დატბორილ 56-ე კილომეტრზე, გაწმენდითი სამუშაოების შედეგად, წყლის დონემ დაიწია.
ახმეტის მუნიციპალიტეტის მერის წარმომადგენლის, ლადო კახოიძის თქმით, გზა ორივე მხრიდან გახსნილია, ხელოვნურ ტბაზე სამუშაოები გრძელდება და გადაადგილებაც მეტად უსაფრთხოა.
ფშაველი-აბანო-ომალოს გზაზე, გასული წლის ოქტომბრიდან ამ დრომდე მოძრაობა აკრძალული იყო. თუშეთთან დამაკავშირებელი ერთადერთი საავტომობილო გზა მაისის ბოლოს უნდა გახსნილიყო, თუმცა, 56 -ე კილომეტრზე ხელოვნურად დაგუბებული ტბიდან გადმოსულმა წყალმა სამანქანე გზა დაფარა.
გზის გაწმენდით სამუშაოებს გზების დეპარტამენტი და კომპანია „არილო" ერთობლივად, ინტენსიურ რეჟიმში აწარმოებენ.