მოსკოვში დაკავებული ჟურნალისტის „მედუზას“ კორესპონდენტის ივან გალუნოვის ხელისგულებზე და ფრჩხილებზე ნარკოტიკების კვალი ვერ აღმოაჩინეს.
როგორც ცნობილია, ის დიდი რაოდენობით ნარკოტიკული ნივთიერების გასაღების მცდელობის ბრალდებით ხუთშაბათს დააკავეს, ხოლო შაბათს გვიან საღამოს შინაპატიმრობაში გადაიყვანეს. მის დაკავებას რუსეთში ძალიან ფართო რეზონანსი მოჰყვა. ჟურნალისტს მხარი დაუჭირა ძალიან ბევრმა კოლეგამ და მედიასაშუალებამ, ასევე ცნობილმა ადამიანებმა.
თვით ივან გალუნოვი და მისი კოლეგები აცხადებენ, რომ სისხლის სამართლის საქმე შეთითხნილია და მის პროფესიულ საქმიანობას უკავშირდება. მისი გამოძიება ეხებოდა დაკრძალვის ბიზნესში არსებულ დარღვევებს. მას დაკავებამდეც ემუქრებოდნენ.