აჭარის უმაღლესი საბჭოს დეპუტატის ცოტნე ანანიძის აზრით, ქალი მაშველების მიმართ გამოთქმული შეფასებები დისკრიმინაციულია. ანანიძე ამბობს, რომ ქალი მაშველების გადაწყვეტილება, რომ სანაპიროზე მოქალაქეების უსაფრთხოებაზე იზრუნონ, გაბედული და თამამი გადაწყვეტილებაა.
„ბათუმი სეზონური დასაქმებისთვის ძალიან კარგი ლოკაციაა, მაშინ როდესაც სამასპინძლო ბიზნესი პერიოდულად ვითარდება. წელს პირველად ჩვენს სანაპიროზე ქალ მაშველებს მიეცათ დასაქმების შესაძლებლობა, რაც მათი მხრიდანაც გაბედული/თამამი გადაწყვეტილებაა და რასაც მივესალმები. სოციალურ ქსელში ამ ფაქტთან დაკავშირებით არაერთი ხუმრობა და უხამსი შეფასებები შეგვხვდა. ჩემთვის ისიც გასაგებია, რომ თავის პირად სივრცეში ადამიანი რასაც დაწერს, ეს მისი საქმეა, თუმცა უნდა გვესმოდეს, რომ მსგავსი დამოკიდებულება არაჯანსაღია, განცხადებები შეიცავს დისკრიმინაციის ნიშნებს“, - განაცხადა ცოტნე ანანიძემ, რომლის კომენტარსაც აჭარის უმაღლესი საბჭოს პრესსამსახური ავრცელებს.