17-18 ივნისს, საქართველოს ენერგეტიკისა და წყალმომარაგების მარეგულირებელი ეროვნული კომისია (სემეკ) ენერგეტიკის მარეგულირებელთა რეგიონულ ასოციაციას (ERRA) მასპინძლობს.
როგორც „ინტერპრესნიუსს“ სემეკიდან აცნობეს, ორი დღის განმავლობაში ასოციაციის მომხმარებელთა და საცალო ბაზრების კომიტეტის სამუშაო ჯგუფის წევრები და შეხვედრის მონაწილეები იმსჯელებენ ენერგეტიკის სექტორში მომხმარებელთა უფლებებზე, მომსახურების ხარისხზე, ბაზრის მონიტორინგსა და კომუნიკაციის სტრატეგიაზე. შეხვედრას სემეკის წევრი მაია მელიქიძე გახსნის.
ამასთან, შეხვედრაში მონაწილეობენ სხვადასხვა ქვეყნის ენერგეტიკისა და წყალმომარაგების მარეგულირებელი ეროვნული კომისიის წარმომადგენლები.
სემეკის ინფორმაციითვე, ენერგეტიკის მარეგულირებელთა რეგიონული ასოციაცია (ERRA) ევროპისა და აზიის რეგიონის ქვეყნების მარეგულირებელ კომისიებს აერთიანებს. ასევე, ორგანიზაციაში გაერთიანებულნი არიან პარტნიორი ორგანიზაციები, მათ შორის ამერიკის შეერთებული შტატებიდან. სემეკი ასოციაციის ერთ-ერთი დამფუძნებელია.
