ბიძინა ივანიშვილმა, როგორც ჩანს სიყვარულის რესურსი ამოწურა და ბატონი სერგეენკო მიდის, - ასე ეხმაურება პარლამენტის ფრაქცია "ნაციონალური მოძრაობის" თავმჯდომარე რომან გოცირიძე გავრცელებულ ინფორმაციას, რომ დავით სერგეენკომ შესაძლოა, ჯანდაცვის მინისტრის პოსტი დატოვოს.

გოცირიძის თქმით, ივანიშვილს ორი „ხელშეუხებელი" მინისტრი ჰყავს დავით სერგეენკოსა და თეა წულუკიანის სახით. მისივე თქმით, უკვე, ალბათ, თეა წულუკიანის წასვლაც არის მოსალოდნელი იუსტიციის მინისტრის პოსტიდან.

„ამ 7 წლის განმავლობაში საქართველოში შეიცვალა 62 მინისტრი. აქედან, ორი ადამიანი იყო ხელშეუხებელი და როგორც ბატონი ბიძინა იტყოდა, განსაკუთრებით საყვარელი. როგორც ჩანს სიყვარულის რესურსი ამოწურა და ბატონი სერგეენკო მიდის. ახლა, ერთი განსაკუთრებული დარჩა საქართველოს ხელისუფლებაში და ალბათ მასაც უნდა ველოდოთ მალე“, - განაცხადა გოცირიძემ.