შს მინისტრის გადადგომის მოთხოვნით “ერთიანი ნაციონალური მოძრაობის” ახალგაზრდული ფრთის წარმომადგენლებმა გორში აქცია გამართეს.

აქციის მონაწილეები სტალინის ქუჩაზე, ერთ-ერთ ე.წ. ზებრა გადასასვლელზე განლაგდნენ და დაახლოებით 2 წუთის განმავლობაში საავტომობილო მოძრაობა შეაფერხეს.

„გადადგეს შს მინისტრი გახარია და დაისაჯონ ის პოლიციელები, რომლებმაც უფლებამოსილებას გადაამეტეს - ეს არის ამ აქციის მოთხოვნა“, - განაცხადა ენმ-ს გორის ორგანიზაციის წარმომადგენელმა და მუნიციპალიტეტის საკრებულოს წევრმა ვასილისა ჯაბახიძემ.

შეფერხებული მოძრაობის გამო საპატრულო პოლიციის ეკიპაჟის გამოჩენისას, მცირემასშტაბიანი აქციის მონაწილეებმა გზის სავალი ნაწილიდან სკვერში გადაინაცვლეს.

ინფორმაციისთვის, გორის გარდა შს მინისტრის გადადგომის მოთხოვნით ახალგაზრდებმა აქცია-პერფორმანსი კიდევ რამდენიმე ქალაქში გამართეს.