ბათუმში დონორთა საერთაშორისო კონფერენცია „მხარდაჭერა სოფლისა და სოფლის მეურნეობის განვითარებისათვის“ გაიმართა

ქალაქ ბათუმში, აჭარის ავტონომიური რესპუბლიკის სოფლის მეურნეობის სამინისტროს ორგანიზებით, დონორთა საერთაშორისო კონფერენცია თემაზე: „მხარდაჭერა სოფლისა და სოფლის მეურნეობის განვითარებისათვის“ გაიმართა. ამის შესახებ „ინტერპრესნიუსს“ გარემოს დაცვისა და სოფლის მეურნეობის სამინისტროდან აცნობეს.

მათი ინფორმაციით, ღონისძიება აჭარის მთავრობის თავმჯდომარემ, თორნიკე რიჟვაძემ, საქართველოს გარემოს დაცვისა და სოფლის მეურნეობის მინისტრის მოადგილემ, ხატია წილოსანმა და აჭარის ა/რ სოფლის მეურნეობის მინისტრმა, ტიტე აროშიძემ გახსნეს.

სიტყვით გამოსვლისას, გარემოს დაცვისა და სოფლის მეურნეობის მინისტრის მოადგილემ სოფლის მეურნეობის განვითარებისთვის საერთაშორისო და დონორი ორგანიზაციების მხარდაჭერის მნიშვნელობაზე ისაუბრა. ხატია წილოსანმა ყურადღება გაამახვილა იმ წარმატებულ პროექტებზე, რომლებიც ბოლო წლებში, სახელმწიფოსა და დონორი ორგანიზაციების მჭიდრო თანამშრომლობით განხორციელდა.

აჭარის ავტონომიური რესპუბლიკის სოფლის მეურნეობის მინისტრმა, ტიტე აროშიძემ დონორი და საერთაშორისო ორგანიზაციების წარმომადგენლებს მადლობა გადაუხადა მხარდაჭერისთვის. მინისტრმა სამომავლო პერსპექტივებზე, აჭარის რეგიონის სოფლისა და სოფლის მეურნეობის განვითარების სტრატეგიაზე, აგროსასურსათო სექტორში განხორციელებულ და დაგეგმილ აქტივობებზე ისაუბრა.

კონფერენციის ფარგლებში, მონაწილეებმა საერთაშორისო და დონორი ორგანიზაციებისათვის კონკრეტული საპროექტო წინადადებები განიხილეს და სამომავლო თანმშრომლობის შესაბამისი სფეროები განსაზღვრეს.

დონორთა საერთაშორისო კონფერენციას აჭარის ავტონომიური რესპუბლიკის მთავრობის წევრები, საქართველოს გარემოს დაცვისა და სოფლის მეურნეობის სამინისტროს, ბათუმის მერიის, საერთაშორისო და დონორ ორგანიზაციების წარმომადგენლები ესწრებოდნენ.

აჭარის რეგიონში დონორთა საერთაშორისო კონფერენცია წელს პირველად გაიმართა. უწყების ცნობით, კონფერენციის მიზანს საერთაშორისო თანამეგობრობის ქვეყნებისთვის რეგიონული განვითარების პრიორიტეტებისა და მათი შესრულების შესახებ დეტალური ინფორმაციის მიწოდება და აჭარის ავტონომიური რესპუბლიკის მთავრობასა და დონორ ორგანიზაციებს შორის თანამშრომლობის გააქტიურება წარმოადგენდა.

ზურაბ ბატიაშვილი - ხელისუფლებას აქვს მარტივი არჩევანი - ან დასავლეთთან ერთად ან დასავლეთის წინააღმდეგ, ამ არჩევანში თუ დასავლეთის და საკუთარი ხალხის წინააღმდეგ წავლენ, ხელისუფლებას მალევე დაკარგავენ
ქართული პრესის მიმოხილვა 04.03.2021
კახა გოგოლაშვილი - ევროკავშირის მედიაცია გახდა ინსტრუმენტი, რომელიც არ არის ერთჯერადი, სანამ კრიზისი არ მოგვარდება, ევროკავშირი ამ პროცესში ჩართული იქნება
შეფუთვის ვინტაჟური სტილი და ევროპული სტანდარტების ქარხანა - „ვაკე“ 2021 წელს სიახლეებით იწყებს
იურიდიული პირები პროკრედიტ ბანკში ანგარიშებს დისტანციურად გახსნიან