კახეთის მხარეში სახელმწიფო რწმუნებული ირაკლი ქადაგიშვილი საგარეჯოს მუნიციპალიტეტში იმ ფერმერებს და მევენახეებს შეხვდა, რომლებმაც აქცია გამართეს.
ირაკლი ქადაგიშვილმა მათთან არსებულ გამოწვევებზე ისაუბრა და მთავრობის წარმომადგენლებთან, კერძოდ, ეკონომიკისა და მდგრადი განვითარების მინისტრ ნათია თურნავასთან და გარემოს დაცვისა და სოფლის მეურნეობის მინისტრ ლევან დავითაშვილთან შეხვედრის ორგანიზებას დაპირდა.
საგარეჯოს მუნიციპალიტეტში, ფერმერებმა და მევენახეებმა აქცია 3 ივლისს გამართეს. აქციის მონაწილეები მთავრობის წარმომადგენლებთან შეხვედრასა და მათ მიერ წარმოებული პროდუქციის (ყურძენი, ღვინო, ხილი) შეუფერხებლად რეალიზაციას ითხოვდნენ. აქციის გამართვის წინაპირობას, ქვეყანაში შექმნილი ვითარება და ის რისკები წარმოადგენდა, რომელიც ტურისტული ნაკადის შემცირებამ და რუსული ბაზრის შესაძლო დახურვამ შეიძლება გამოიწვიოს.