უფლისციხეში ტურისტული გამოფენა-გაყიდვა გაიმართა. როგორც „ინტერპრესნიუსს“ გორის მუნიციპალიტეტიდან აცნობეს, ღონისძიების მიზანი გორში ტურიზმის განვითარების ხელშეწყობა იყო.

მათი ინფორმაციით, ღონისძიების ფარგლებში, ხალხური რეწვის, ქართული სამზარეულოსა და სასმელების გამოფენა- გაყიდვა გაიმართა. ქართველი და უცხოელი სტუმრებისთვის განწყობის შესაქმნელად, გამოფენა - გაყიდვის პარალელურად, მუზეუმ-ნაკრძალის მიმდებარე ტერიტორიაზე ადგილობრივი შემსრულებლების მონაწილეობით კონცერტი მიმდინარეობდა.

გორის მერმა კონსტანტინე თავზარაშვილმა მადლობის ნიშნად ყველა ორგანიზაციასა და მეწარმეს ღონისძიებაში მონაწილეობისთვის სერტიფიკატები გადასცა და წარმატებები უსურვა.

ღონისძიება გორის მერიისა და შიდა ქართლის სამხარეო ადმინისტრაციის მხარდაჭერით, გორის მუნიციპალიტეტის ა(ა)იპ კულტურისა და ტურიზმის განვითარების ხელშეწყობის სააგენტოს ტურიზმის განყოფილების ინიციატივითა და ორგანიზებით გაიმართა.